GES súmase á campaña “Move un Dedo”, un chamamento á acción pola inclusión real das persoas con discapacidade

Galega de Economía Social (GES) únese á difusión de “Move un Dedo”, a nova campaña impulsada por COCEMFE para promover o coñecemento e a aplicación da Estratexia Española sobre Discapacidade 2022–2030, a folla de ruta que marca o camiño cara á garantía plena dos dereitos das persoas con discapacidade física e orgánica.

No marco da alianza que mantemos con COCEMFE para apoiar accións de comunicación inclusiva ao longo de 2025, queremos amplificar esta iniciativa que nos lembra que, ás veces, un pequeno xesto pode transformar realidades.

Un xesto simbólico que chama a pasar á acción

A campaña “Move un Dedo” constrúese arredor dun xesto sinxelo que apela á responsabilidade individual e colectiva. A través dun vídeo divulgativo, contidos dixitais e unha web interactiva, invítase á cidadanía, ás administracións, aos medios e ás propias organizacións sociais a implicarse activamente na inclusión real das persoas con discapacidade.

A iniciativa inclúe un gran mural colaborativo no que cada persoa pode deixar a súa pegada dixital, como símbolo do compromiso social coa igualdade de oportunidades. Ademais, na páxina web da campaña é posible descargar materiais prácticos con ideas para “mover un dedo” desde distintos ámbitos da vida diaria: no traballo, no centro educativo, na comunidade ou na propio contorna social.

Un impulso para avanzar na Estratexia 2022–2030

COCEMFE e GES lembran que, malia os avances logrados nos últimos anos —como o desenvolvemento do marco lexislativo en materia de discapacidade, as melloras en accesibilidade, a consolidación de prestacións sociais ou o avance na inclusión educativa e laboral— aínda quedan moitos retos por abordar.

Aspectos como o emprego, a educación inclusiva, a igualdade de xénero, a accesibilidade universal ou a atención sanitaria en condicións de equidade seguen requirindo compromiso e acción continuada. A campaña “Move un Dedo” nace precisamente para activar este compromiso social, lembrando que a Estratexia Española sobre Discapacidade 2022–2030 marca un camiño claro, pero precisa a implicación de todas as administracións, empresas e axentes sociais para facelo realidade.

Como parte da difusión da campaña, invitamos a toda a comunidade de Galega de Economía Social a visualizar e compartir o vídeo oficial:

Vídeo “Mueve un Dedo”: https://youtu.be/cnH_iLPrwMs?si=yUIMUn5XhiHpZoW3