Un doce recordo do 35 aniversario de COGAMI: un agasallo feito con inclusión e compromiso

O 35 aniversario de COGAMI foi unha celebración moi especial. Preto de 800 persoas, entre autoridades, profesionais, persoas usuarias, entidades colaboradoras e traballadores e traballadoras da organización, reuníronse para conmemorar tres décadas e media de compromiso coa inclusión e os dereitos das persoas con discapacidade en Galicia.

Entre os momentos máis emotivos do acto destacou o agasallo preparado para as persoas asistentes, un detalle simbólico que representa á perfección os valores de COGAMI: colaboración, calidade, responsabilidade social e traballo en rede. Na súa elaboración participaron tres das empresas e entidades vencelladas a COGAMI: Grafinco, Hornos de Lamastelle e Íntegro, a través do proxecto Diversiplas.

Grafinco: deseño, impresión e identidade cun valor social

O equipo de Grafinco, imprenta de referencia no sector gráfico en Galicia, foi o responsable de darlle forma visual ao 35 aniversario de COGAMI.

Desde a implementación do logotipo e da imaxe conmemorativa, ata a impresión das bolsas oficiais e os bolígrafos personalizados, cada elemento foi coidado ao detalle.

Ademais, Grafinco encargouse dun dos aspectos máis valorados polas persoas asistentes: o packaging da tarta conmemorativa, deseñado e producido con precisión e creatividade, e no que tamén figuraba o logotipo do aniversario.

Un traballo técnico impecable que reflicte o potencial e profesionalidade das empresas que forman parte de COGAMI Empresarial.

   

Hornos de Lamastelle: o sabor da celebración

A parte máis doce do agasallo chegou da man de Hornos de Lamastelle, que elaborou unha deliciosa tarta de améndoa da variedade marcona, moída na propia planta no momento da súa preparación.
A receita completábase con azucre, ovo e un toque de brandi, e para a decoración utilizouse azucre en po cun debuxo impreso do logotipo do 35 aniversario de COGAMI.

O resultado foi unha peza única: un doce artesanal que combinaba tradición, coidado polo detalle e identidade corporativa, converténdose nun símbolo perfecto da celebración.

Íntegro e o proxecto Diversiplas: detalles con propósito

A celebración tamén contou coa colaboración da asociación Íntegro, que participou a través do seu proxecto Diversiplas elaborando unhas pulseiras personalizadas e artesanais para os asistentes ao evento.

As pulseiras foron confeccionadas integramente con materiais reciclados no taller de Diversiplas e empaquetadas no centro ocupacional de Íntegro, combinando creatividade, inclusión e sostibilidade.

Estes detalles son un exemplo perfecto do traballo que desenvolve Íntegro: produtos únicos e responsables para empresas e eventos, feitos con coidado e compromiso social.

Un obsequio con valor social

Este agasallo non foi só un recordo do evento, senón tamén unha mostra práctica do modelo que COGAMI Empresarial defende: unha economía social inclusiva, na que as persoas con discapacidade teñen un papel protagonista e produtivo.

A colaboración entre Íntegro, Grafinco e Hornos de Lamastelle amosa o potencial das empresas de COGAMI Empresarial para ofrecer servizos e produtos de alta calidade, con impacto social positivo e baseados nos valores da responsabilidade, o traballo en equipo e a inclusión. Un pequeno agasallo feito con talento, compromiso e corazón.