GES participa no III Foro de Sostibilidade e Economía Circular da man de Rosa Gutiérrez, Directora de Negocio

Galega de Economía Social estivo presente no III Foro de Sostibilidade e Economía Circular, un evento organizado por APD (Asociación para o Progreso da Dirección) en colaboración coa Xunta de Galicia, no marco do programa Capacita Directivos.

Neste espazo de encontro e reflexión, participaron líderes e representantes de empresas que están a transformar o tecido económico dende unha perspectiva sostible, innovadora e comprometida co medio ambiente e co futuro das persoas. Entre as voces destacadas do foro estivo Rosa Gutiérrez, Directora de Negocio de GES, quen compartiu a súa visión sobre o papel clave da economía circular no futuro das organizacións.

Durante a súa intervención, Rosa Gutiérrez destacou que “o futuro da empresa é circular, innovador e con propósito”, facendo fincapé na necesidade de repensar os modelos tradicionais de negocio e apostar por unha transformación real que integre a sostibilidade de maneira transversal en todas as áreas da empresa: dende a cultura organizativa ata a cadea de valor.

O evento serviu tamén como plataforma para amosar casos reais de compañías que teñen na sostibilidade o eixo central da súa competitividade, innovación e crecemento sostible a longo prazo. A mensaxe foi clara: ser sostible non implica renunciar á rendibilidade, senón anticiparse, xerar valor compartido e construír vantaxes diferenciais nun contexto cada vez máis esixente e regulado.

Sen dúbida, foi unha mañá inspiradora, chea de aprendizaxes, experiencias compartidas e ideas orientadas a activar o cambio nas empresas e na sociedade. Dende GES, reafirmamos o noso compromiso cun modelo empresarial centrado nas persoas, no impacto positivo e na construción dun futuro máis sostible para todas.